O Consello presenta o seu informe sobre a dinámica empresarial de Galicia

Exceso de burocracia, dificultades de acceso ao financiamento ou baixa cualificación do persoal. Estas son algunhas das eivas que atopan as empresas galegas para medrar e gañar competitividade, segundo se recolle no informe "Tecido empresarial galego e dinâmica empresarial. Análise comparada", aprobado polo Pleno do CES o pasado 4 de decembro e que se presentou onte en Vigo. Elaborado a través dun convenio de colaboracíón coa Universidade de Vigo, o informe recolle máis dunha trintena de propostas concretas para eliminar ou aminorar as dificultades que atopan as empresas para gañar dimensión e posición no mercado.

Na presentación, os autores da investigación, do grupo GEN da Uvigo, salientaron que, logo da analise da realidade, o seu labor centrouse en aportar recomendacións concretas que mellorar a dinámica empresarial.

Pola súa banda, o presidente do CES, Manuel Pérez, gabou a colaboración coa institución académica e o nivel de entendemento acadado entre os investigadores e os membros da comisión do Consello que traballaron no documento.

Como todos os traballos do Consello, este informe pode consultarse nesta web do CES.

Na imaxe, a vicerreitora de Comunicación da Uvigo, Mónica Valderrama, e o presidente do CES, Manuel Pérez, cos membros do equipo redactor do informe Santiago Lago, Patricio Vázquez e J. Franciso Armesto.